Русины схвалили проґрам розвитку. Зволили собі і нову презідію

Пряшів, 3-го мая 2015 р.

Через вікенд в Пряшові проходило 15-те засіданя Округлого стола Русинів Словеньска (ОСРС). Найважнішым пунктом проґраму было схваліня Проґраму розвитку русиньской народностной меншыны в Словацькій републіці. Платформа собі зволила і нову презідію.

Засіданя зачало в суботу святочнов частьов. Членове ОСРС ся стрітили коло памятника Александра Духновіча, де положыли квітя, жебы так почестовали 150-ту річніцю смерти того найвекшого народного будителя карпатьскых Русинів. Потім вже проґрам продовжовав традічно робочов частьов.

Найважнішов частьов 15-го засіданя ОСРС было схваліня Проґраму розвитку русиньской народностной меншыны в Словацькій републіці, документу, на котрім робили членове од початку свойой діяльности у 2012 р. Проґрам розвитку має окрім преамбулы пять частей – Народностна самосправа, Школство, Култура, Інштітуції, Села і міста. За выпрацованя окремых частей были одповідны ґаранты окремых комісій, котры были коло ОСРС заснованы. Головным кооріднатором документу быв першый председа і сучасный член ОСРС Александер Дулеба. Тот документ має быти проґрамом Русинів на слідуючіх 10 аж 20 років і має забеспечіти розвиток русиньской народностной меншыны і спомаліня асімілації. Окремым доповніньом того проґраму має быти пропозіція Закона о народностных меншынах із ділні ОСРС, котрый хотять Русины дати на публічну цілосполоченьску діскузію  з цільом глядати штонайшыршу обчаньску і політічну підпору про приятя закона, котрый доднесь Словацькій републіці в одношіню ку меншынам бракує. Часть того закона находить ся і в першій части схваленого проґраму і говорить о народностній самосправі, котра бы мала быти чісто в области културы і народностного школства, значіть не іде о теріторіалны самосправы.

По року собі ОСРС волив і нову презідію. Функцію председы по році знова обгаїв Андрій Ліґа, правник жыючій в Пряшові. Далшыма членами презідії суть: секретарь Мілан Піліп, говорця Петро Медвідь, представитель колектівных членів Люба Кральова (О. з. Колысочка – Kolíska), представитель індівідуалных членів Петро Юрчішін. Членами презідії  ex offo суть членове Выбору про народностны меншыны і етнічны ґрупы Мілан Мнягончак і Ян Липиньскый.

Петро Медвідь, пресовый говорця ОСРС

(Веце інформацій на www.pilip.sk)