Пряшів, 4. 10. 2024 р.

В пятніцю 4-го октобра 2024-го року в Пряшові одбыло ся 38-ме засіданя Округлого стола
Русинів Словакії (ОСРС), котре вів председа той русиньской платформы Петро Штефаняк.

Членове окрім іншого дістали інформацію о роботі, котра проходить в окремых комісіях ОСРС –
історічній, културній, леґіслатівній, про реґіоналный розвиток і самосправы, про школство і
русиньскый язык, а церьковній комісії.

Членове были так само інформованы о тім, же послідня спомянута комісія – церьковна, дістала
нового коордінатора, котрым став ґрекокатолицькый священик Іґор Панчак. Тота зміна пришла
на основі факту, же до ОСРС недавно вступила нова членьска орґанізація, котров є Общество
святого Йоана Крестителя.

Якраз тота орґанізація має унікатну заслугу на перекладах літурґічных і біблічных текстів на
русиньскый язык і на душпастырьстві русиньскых ґрекокатоликів у їх материньскім языку.

До ОСРС вступила в остатнім часі іщі єдна орґанізація, котров є Асоціація русиньскых
подникателів. Асоціація была основана у 2023-ім році з цільом, жебы підтримовати співпрацу
русиньскых бізнісменів, русиньску културу, язык і традіції, а творити условії про їй розвиток.

У 2025-ім році Русины на Словакії припомянуть собі 30 років од святочного выголошіня
кодіфікації русиньского языка в Братіславі, што было першым із сповненых цілів, котры собі
Русины із Словакії а далшых країн дали на 1-ім Конґресі русиньского языка в Бардейовскых
Купелях у 1992-ім році.

27-ый януар 1995-го року тым став важным історічным пунктом, котрый потвердив
самобытность і укріпив еманціпацію Русинів по роках українізації. І вдяка кодіфікації є днесь
русиньскый язык языком театру, пресы, медій, Русины мають своє властне радіове і телевізне
высыланя, властный інштітут на Пряшівскій універзіті, а русиньскый язык має своє місце і в
освітнім процесі на школах.

Кедьже выголошіня кодіфікації русиньского языка належыть меджі найважнішы моменты
возродного процесу по 1989-ім році, ОСРС на своїм засіданю прияв рішіня, котрым выголосив
рік 2025 за Рік русиньского языка.

ОСРС представить лоґо юбілейного року, як і актівности повязаны з тым роком, котры будуть
заміряны на пропаґацію і хоснованя русиньского языка, початком рока.

Членове у вольбах потвердили у своїх функціях говорцю ОСРС Петра Медвідя і секретаря
Мафтея Допіряка на далшый дворічный період. Так само в рамках ротуючой презідії собі
платформа зволила двох новых членів, котрыма стали Йосиф Бадида за індівідуалных членів і
за колектівных членів Мілош Стрончек, котрый є председом Окресной орґанізації Русиньской
оброды у Свіднику – членьской орґанізації ОСРС.

ОСРС на своїм засіданю так само прияв рішіня, же зробить далшы крокы, жебы вырішыти
проблему збірковых фондів, якы походять із русиньскых сел, а дотеперь суть частьов СНМ –
Музея україньской културы у Свіднику, де суть презентованы як артефакты україньской
културы, з чім Русины не можуть быти согласны.

Петро Медвідь, говорця ОСРС
Веце інформацій: www.okruhly-stol.sk