Новым председом ОСРС є Ян Липіньскый

Пряшів, 18. фебруар 2017 р.

В Пряшові в суботу 18-го фебруара проходило вже 21. засіданя Округлого стола Русинів Словеньска (ОСРС). Платформа, котра зъєдинять русиньскы професіоналны інштітуції, обчаньскы здружіня і незалежных актівістів, собі выберала нову презідію.

Новым председом ОСРС ся став Ян Липіньскый, котрый перевзяв веджіня по Міланови Піліпови. Тот зіставать членом презідії  „ex offo“, кідьже є єднако як Липіньскый членом Выбору про народностны меншыны і етнічны ґрупы Рады влады Словацькой републікы за русиньску народностну меншыну. За індівідуалных членів быв до презідії выбратый Михал Секерак, староста села Баєрівці, за інштітуції і орґанізації є од суботы членом презідії Осиф Ткач із Театру Александра Духновіча в Пряшові. Членами презідії і надалше зіставають Якуб Тулея, котрый быв потвердженый во функції секретаря ОСРС і Петро Медвідь во функції говорцю.

Платформа на своїм засіданю окрім іншого говорила о приготовльованых подіях, котры ся мають одбыти в тім році в рамках Рока Адолфа Добряньского. ОСРС тот рік выголосив із нагоды 200-го юбілею од народжіня того вызначного русиньского будителя і першого депутата за Вышнє Угорьско в Угорьскім сеймі, де войовав за права Русинів і Словаків.

Інж. Ян Липіньскый (1963 р.) ся народив в Крайній Порубці в окресі Свідник. Є русиньскым актівістом, співосновательом Здружіня інтеліґенції Русинів Словеньска (1995) і Округлого стола Русинів Словеньска (2012). В році 1997 подав вєдно із Андрійом Марчішіном успішну скаргу на Словацькый розглас за нерешпектованя прав Русинів в области народностного радіового высыланя. В роках 2003 – 2012 быв членом Справной рады Інштітуту памяти народа. Од 2011-го року є представительом Русинів во Выборі про народностны меншыны і етнічны ґрупы Рады влады Словацькой републікы. Є продуцентом документарных філмів заміряных на русиньску історію і особности Преосвященый… (Василь Гопко, блаженый Русин) (2008), Йосиф і його братя (2009) і Душы Карпат (2013). Так само є співатором проєктів Чемериця, котры суть заміряны на підпору і охорону людьскых прав і народностных прав Русинів на Словакії. Жыє в Братіславі.

Петро Медвідь, пресовый говорця ОСРС

Веце інформацій: www.okruhly-stol.sk