Русины собі на будучій рік будуть припоминати Адолфа Добряньского
Пряшів, 2. апріля 2016 р.
У Пряшові днесь проходило 18-те засіданя Округлого стола Русинів Словеньска (ОСРС). За
голову русиньской платформы, в котрій суть зъєдинены русиньскы обчаньскы здружіня,
професіоналны інштітуції і незалежны актівісты, быв зволеный Мілан Піліп.
Міджі найголовнішы пункты проґраму днесь належало проїднаня ближачого ся 200-го юбілею
од народжіня вызначного русиньского народного будителя Адолфа Добряньского, котрый быв
першым посланцьом в Угорьскім сеймі за Вышнє Угорьско і як посланець в нім обгайовав права
Русинів і Словаків. О його приятельскім одношіню ку словацькому народу свідчіть і то, же быв
єдным із основаючіх членів Матиці Словеньской. Із нагоды округлого юбілею од його
народжіня ОСРС выголосив рік 2017 за Рік Адолфа Добряньского.
В рамках того року хоче ОСРС зорґанізовати актівности, котры будуть мати за задачу підняти
інформованость о тій вызначній історічній особности міджі Русинами, но і цілково в словацькій
сполочности. Русиньска платформа буде так само коордіновати актівности прямуючі ку
всокочіню родного дому А. Добряньского – старого будинку парафії в селі Рудьлов, в котрім бы
ся в будучности могла вытворити Добряньского памятна ізба зо свойов сталов експозіціов. О
можливостях всокочіня родного дому Добряньского і його далшого хоснованя уж перешли і
першы стрічі з представителями Ґрекокатолицькой церькви на Словакії, кідьже будинок є
церьковным маєтком.
ОСРС собі по року выберав і свою нову презідію. Председом платформы ся став Мілан Піліп,
котрый быв од заснованя ОСРС його секретарьом. Новыма членами презідії ся стали: Якуб
Тулея – секретарь, Імріх Цупер – представитель орґанізацій і Теодозія Латтова –
представителька індівідуалных членів. В презідії зістав Ян Липіньскый, член Выбору про
народностны меншыны і етнічны ґрупы за русиньску народностну меншыну, котрый є членом
презідії „ex offo“ і Петро Медвідь у функції говорцю.
Бардейовчан Мілан Піліп є русиньскый актівіста, председа Містной орґанізації Русиньской
оброды на Словеньску в Братіславі, котрый стояв коло выникнутя ОСРС. Є абсолвенстом
політолоґії на Пряшівскій універзіті в Пряшові. В роднім Бардейові є депутатом містьского
заступительства, до котрого быв зволеный як незалежный кандідат. Робить на Міністерстві
обраны Словацькой републікы.
Петро Медвідь, говорця
Веце інформацій: www.okruhly-stol.sk
—————————————————————————————————————
———————————
Pridaj komentár